ليـــــالى الحلميـــــــــة
ومنين بييجى الشجن...من إختلاف الزمن
ومنين بييجى الهوى...من إئتلاف الهوى
ومنين بييجى السواد...من الدموع والعناد
ومنين بييجى الرضا...من الإيمان بالقضا
من اصطبار الروح ييجى النهار...من انحسار اليأس ييجى الأمل
من اختمار الحلم ييجى الصباح...يعود غريب الدار لاهل وشجن
ليه يا زمان مسبتناش أبرياء...وواخدنا ليه فى طريق ممنوش رجوع
أقسى همومنا يفجر السخرية...وأصفى ضحكة تتوه فى بحر الدموع
ولفين ياخدنا الأنين...لليالى ملهاش عينين
ولفين ياخدنا الحنين...لواحة الحيرانين
متسرسبيش يا سنينا من بين ايدينا...ومتنتهيش ده احنا يادوب ابتدينا
واللى له أول بكرة ح يبانله آخر...وبكرة تفرج مهما ضاقت علينا
أميـــــــرة فى عابديـــــــــــن
مين اللى قال مكتوب علينا الهوان...لا الدنيا سيرك ولا الزمان بهلوان
شي الله يا طاهرة يا رئيسة الديوان...آن الأوان نبقى احنا آن الأوان
وآديكوا يا ولاد الأصول شاهدين...وآدى" أميرة" أميرة فى عابدين
ياللى الزمن خدكم لفوق فى صعود...ورجع وخان أحلام كبيرة ووعود
عودوا لأصولكم ياللا للأصل عود...ده اللى يمد جدوره يشتد عوده
حكمة وقالوها جدودكم الخالدين...وآدى "أميرة" أميرة فى عابدين
زيح عن عينيك غيم الظلام والضلال...وعيش وعيد زمن البراءة القديم
وخد اللى ليك يغنيك مادام مال حلال...وتستقيم تبقى فى نعيم مستديم
يا قلبى ده احنا وبكرة متواعدين...وآدى" أميرة" أميرة فى عابدين
مـــن الذى لا يحــــب فــاطمـــــة
بين ريح وأمواج متلاطمة...واسود غطيس واصفر رنان
مين اللى ميحبش فاطمة...لو فاطمة طاقة شوق وحنان
من غربتك فى ديار أهلك...لغربتك فى بلاد الله
لو ضى قنديل زهزهلك...مش ترمى كله وتجرى وراه
مين اللى ما يحبش فاطمة
يا هل ترى يا نور يا بعيد...انت بصحيح ولا انت سراب
وهاعيش معاك فى الضى سعيد...ولا غريب ما بين أغراب
مين اللى ما يحبش فاطمة
الوسيــــــــة
وتستمر الحياة...بين ابتسامة وآه
فيها اللى تاه فى دجاه...واللى ضميره هداه
وكل ضيقة بعدها وسعة...وآهى دى الحقيقة بس منسية
وكلنا ولاد تسعة وبنسعى...ودى مش وسية الناس سواسية
لملم جروحك يا حزين وامشى...خطوة كمان وتخف آلامك
واحلم بعين صاحية ولا تنامشى...غير لما تشرق شمس أحلامك
المــــال والبنــــــون
قالوا زمان دنيا دنية غرورة...وقلنا واللى تغره يخسر مصيره
قالوا الشيطان قادر وله ألف صورة...قلنا ما يقدر ع اللى خيره لغيره
إيه معنى دنيتنا وغاية حياتنا...إذا بعنا فطرتنا البريئة الرقيقة
وازاى نبص لروحنا جوة مراياتنا...إذا احنا عيشنا هاربانين م الحقيقة
المال تجيبه الريح وتاخده الهوايل...أما البنون يوم الحساب بيفوتونا
مال ايه؟ ده لو كان مال قارون كله زايل...ولا غير عمايل الكون ياهووه انجدونا
ومين نكون ان بعنا يومنا و ماضينا...وازاى نعيش إذاكنش بكرة يراضينا
وازاى ننام من غير ما نحلم ببكرة...وبكرة ده منين ييجى إلا بإيدينا
بحلم وافتح عينيه...على جنة م الإنسانية
والناس سوا بيعيشوها...بطيبة وبصفو نيه
أحلامى تصلبلى ظهرى...ويروق ويصفالى دهرى
ويلالى زهرى وجواهرى...لكل ناسى وليه
لا المال نور طريقى...ولا البنون بلوا ريقى
عملى فى حياتى رفيقى...فى وقفتى الأخرانية
يا دنيا مهما تضرى...غيرى مسيرك تمرى
وبعد مرى تسرى...نفسى العفيفة الغنية
Subscribe to:
Post Comments (Atom)
3 comments:
باين ذوق الكاتب والشاعر سيد حجاب
يستحق التكريم
راحت فين رائعة العم سيد حجاب اللى بتقول ..... يا عم آدم عيالك متبعترين فى المتاهة .... دوسنا بقدمنا خيالك وحياتنا ضلت هداها ......مدينا فى الكون خطانا .... زدنا فغلطنا وخطانا .... واما زمنا عطانا .... صرنا لإبليس بطانة
الله يرحمه شاعر بكل ماتحمله الكلمة من معاني
Post a Comment