تشــــــــــــــــــابه

مش عارف ليه النقاد دايما بيكتبوا عن التشابه فى الأغانى العربية مع بعضها أو مع بعض الأغانى الأجنبية من جانب التلحين أو التوزيع الموسيقى

مثلا قرأت فى مرة وبصراحة مش فاكر مين الناقد اللى كان بيتهم عمرو مصطفى فى إنه أعماله كتير منها متشابه مع أغانى أجنبية وطبعا بيتهمه بأنه سارق للأفكار ومش مجدد فمثلا قال إن:- لو سمعت أغنية يـــــورى مــرقــــــدى اللى إسمها بحبــــــك مـــــــوت وهى ألحان عمـــرو مصطفـــــــــى تلاقيها بالضبط مأخوذة عن أغنية للمطرب الأسبانى إنريـــــــكى إجــلاسيـــــاس اللى إسمها

Bailamos

ولو إنى شايف إن الأغنيتين مفيهومش أى حاجة شبه بعضها غير إسم الأغنيتين فى اللحن شبه بعضه بمعنى لو سمعت الأغنية العربى تلاقى لحن كلمة بحبك موت مشابه جدا للحن كلمة (بايلاموس) فى الأغنية الأجنبية ولكن مش هتلاقى أى تشابه آخر

طب ليه نسمى ده سرقة؟ ونحبط الملحن علشان - يا عم مش هقول صدفة لأ هو قاصد- كلمة لحنها شبه كلمة

ما هو ممكن عمرو مصطفى أساسا يكون بنى لحن الأغنية كاملة على لحن كلمة بحبك موت لما عرف يخليها على وزن (بايلاموس) وزى برضه لحن أغنية الليلادى للفنان عمــــرو ديــــاب واللى مشابه فيه جدا لحن جملة (الليلادى سيبنى أقول واحب فيك) مع لحن أغنية أجنبية مشهورة جدا وقديمة كان إسمها

sway

واللى فيها جملة بتقول

:when the rythem start to play

نفس لحن الجملة المذكورة من أغنية عمرو واللى هى برضه ألحان عمرو مصطفى وبرضه أنا عند رأيى إن عمرو مصطفى ممكن يكون بنى لحن الأغنية على هذا الإقتباس بين الجملتين

بصراحة أنا بشوف اللى بيتهم واحد زى ده بالسرقة هو عدو النجاح

لكن الجميل بقة إن أنا بقيت أقارن الأغانى العربية مع الأغانى الأجنبية لو تشابهت فى الكلمات واللى أنا بأعتقد إن ده فعلا لازم يكون المؤلف سمع الأغنية الأجنبية وعجبته فكتب نفس الفكرة بالعربى بس طبعا لفقر الثقافة محدش بياخد باله من ده وأنا مش بتهم المؤلف بالسرقة هنا ولكن أنا بالعكس بيعجبنى اللى بيقدر يعمل كده لأنه بيوزن الكلام ويقفيه ويخرج أغنية كل اللى فيها إنه الفكرة هى نفس فكرة الأغنية الأجنبية

المثال على كده أغنية النجم محمـــــــد فـــؤاد : دمعتيــــــــن واللى كلامها فكرته نفس فكرة أغنية لفريق

Take That: Babe

وإسمع الأغنيتين وإفهم كلام الأغنية الأجنبية وأحكم بنفسك

مثال آخر: أغنية الفنان حكيـــــــــم : كلـــــه يرقــــــص واللى تتشابه فى كلماتها إلى حد كبير مع أغنية

Bee Gees: You Should be Dancing

وللحديث بقية إن شـــــاء اللــــــــــــــــه